BRUNO CIMINO -POETA DI TROPEA
U MARI NOSTRU
Quandu u mari nostru
respira chjanu l’aria soi
non c’è pitturi
capaci pimm’u pitta
nè poeta pimm’u canta
E ghjè tutt’u stessu:
mari Picciulu e mari Grandi,
Portu e Rotonda,
Cannuni, Linguata,
Passu Cavaleri e Razzia.
Certi voti, nui trupiàni, no ’ndi ndaccorgimu
ca u guardamu ca vucca aperta:
succedi quandi pari ca sentimu na vuci chi ndi dici:
stati cca, no ’n’aviti u v’indi jàti.
E cu volarrèa mu si movi
di st’acqua trasparenti!
e sempri limpida nta tutti i momenti:
nui sulu di tea simu nnammurati.
Ambeci vui
chi veniti d’Amarica e puru di l’Olanda,
‘nzomma chi ssiti furisteri,
a mu viditi, stu mari,
sinnò no ’nci criditi
c’accusì no ’nd’avi annuia vanda.
Forsi u pensu sulu ieu
ma si u Signuri a faccia
voli mu si sciacqua
sulu cu st’acqua u poti fari.
MIMMO NUCERA -PROVINCIA DI REGGIO C.
MAMMA,DIMMILLU TU
"Mamma, dimmillu tu, chi è l’amuri?
E’ veramente ju gran sentimentu
chi tutti dinnu? O è gran duluri?
Oppuru è gioia? O è gran turmentu?
Mamma, dimmillu, cacciami ‘stu pisu,
è tuttu veru chiju chi cridia?
Cà sulu tu, chi si ‘nt’o Paradisu,
mi lu po’ diri, haiu sulu a ttia".
Poi chiusi l’occhi ed ija rispundiu:
"L’amuri chi tu dici è bellu assai,
picchì è ‘na cosa chi la fici Diu.
Però l’amuri veru, figghiu miu,
chiju chi dura e chi no’ mori mai
è sulu chiju chi ti dezzi iu"!
PAOLO ARCELLA-POETA DI VIBO
"A DURCIZZA"
A durcizza i nu cani e i nu gattu,
i nu fileju cundutu nto piattu,
i na carizza i n’amuri ruttu,
i nu sentimentu chi njeleu du tuttu,
A durcizza i na fimmana pacchiana,
n’amuri i na bella paisana,
A durcizza i na vuci chi ogni tantu sentu,
cadda,bella e cchina di lamentu.
A sentu puru quandu dormu,
chi mbellisci tuttu lu cuntornu.
A durcizza i na Matri sula,
i nu mejaru subba a na sipala,
c’arriggetta sulitariu nu minutu,
chi si posa pemmu pijja hjatu.
A durcizza d’annammurata nzonnu,
chi luntana cerca mu mbicina,
chi ti vasa mandanduti la luna,
da sua vuci chi cchianu t’abbanduna.
A durcizza è nu penzeru genuinu,
comu n’arangu russu nto panaru,
comu nu pendijju tostu i nu piraru,
comu na Matri chi u Fijju ncia’mmazzaru.
A durcizza i na guardata tosta,
i na malincunia chi non mi dassa,
i n’amuri chi vaci e chi veni,
i nu carciaratu chi si strazia nta li peni.
A durcizza i n’alica di mari,
chi subba a rina civetta s’alliscia,
e l’acqua du mari chianu à ccarizza.
NICOLA GIUNTA -REGGIO C.
" NTA 'STU PAISI"
'Nta 'stu paisi 'nc'esti sulu 'a piria,
'a strufuttenza fissa, a 'grandi bboria;
n'ta 'stu paisi cunta sulu a 'mbiria,
pirciò non sunnu tutti chi cicoria...
Erba nana ed amara, erba pirduta:
senza mâ provi, 'a ggiùrichi â viruta;
e cca, sarbu a carcunu di ll'affritti,
su' tutti storti ammanicati ddritti!
Nani su' iddi e vonnu a tutti nani;
nci vannu terra terra, peri e mmani;
e, pâ malignità brutta e superba,
cca non crisci chi erba, erba, erba...
Arburi?... Si carcunu 'ndi sciurisci,
'nci minunu petrati non mmi crisci...
Arburi, nenti!, comu all'atri bandi,
ch'unu s'asciala chi mmì viri randi!...
Ambatula tu fai.. Rresti cu 'ngagghiu...
Si senti sempri chi 'nc'è fetu d'agghiu...
Cca 'a fortuna non varda a ccu' s'annaca,
ma passa ammenzu all'erba mi 'nci caca...
Paisi d'erba i ventu' e non di pianti:
va facitila a nto culu tutti quanti!
Si 'nc'esti 'nu cartellu aundi rici:
“Sti 'ggenti tra di iddi su' nnimici!”
Nimici i cui? Oh, fabbrica di storti!
Sunnu sulu nimici da so' sorti!
Nimici d'iddi stessi pi ppuntigghiu,
i cchiù fissa dû mundu sunnu a Rriggiu!
FRANCESCO RESTUCCIA-POETA DI JOPPOLO
VOGGHIU POCU
Vogghiu pocu, quasi nenti,
vogghiu u campu di pezzenti,
na pignata di suriaca,
capicoja e supprissati,
nu crapettu chi patati,
nu picciuni i primu iuntu,
nu gaiuzzu i primu cantu,
na nzalata i pumadoru
cu tri affetti di citrolu,
quattru alivi sutta sali,
nu biccheri i bonu vinu
quandu mbivu u torna chinu,
nu sicarru grossu e longu
quantu lignu di bandera
pimmu appicciu a la lumera
mu nci ammustru a cui m’ammira
ca pippìu matina e sira
e no vogghiu no cchiù nenti,
no amici e no parenti,
vogghiu u campu spinseratu
a lu suli assulicchiatu.
ed altre ancora cliccando QUI
